24.9 C
Bol
Četvrtak, 29 rujna, 2022

Što je Bolski parapet?

Svi znomo ča je parapet jer svako misto u Dalmaciji imo makor jedon parapet. Nimodu sva mista pjace, đardine, ili nike trgove di se judi mogu okupljat, družit se, di se liti mogu malo rashlodit, di čovik može malo počinut i ubit vrime u razgovoru i druženju.

Ali, parapet, to pinku ugrođenega zidića, redovito široko jušto toliko da čoviku može stat guzica, imo svako misto.

Danas su u muodi kafići. Sedu judi za tavulin. Sedu dvojica, trojica, ili četvorica. Nis nego sje, eto ti konobara:

  • „Dobra večer, izvolite…“

Judi onda naručidu piće. One ča sedidu za drugin tavulinon ne poznaješ po nesmiš vikat, nesmiš pivot, beštimat… Nesmiš se ni naglos smijat.  

Za sest na parapet ni potriba imat takuin i zato je svakemu Bročaninu nojdraže sest na parapet. Liti, kad se nojveče troši – pogotovo.

Istina, konobari te grubo gledodu, ali ti ne dohodidu, ne prilaze i ne tirodu te. Sa parapeta nikad, nikuor, nikoga, ni potiro. Parapeti su uvik bili slobodne zone.

Za sest na parapet ni ti potriba društvo.

Možes sedit nojveče pijet minuti i društvo če ti somo duoč. Sedječ na parapetu u uru vrimena vidičeš i čučeš sve ča se u misto danas dogodilo. Sve istine i sve loži, sve čakule, fjabe i sve gočice… Kraj tebe če pasat doboto svi koji su tu večer izošli vonka.

Mladiči gledodu cure, a cure gledodu mladiče. Sa parapeta se baciju parve očode, na njemu se misli i pripremo osvajačka strategija i sa parapeta se grije u akcije. Na njemu se pasoje bazna obuka koja uvik doje dobre rezultate.

Mi u Buol imomo tri parapeta. Na Veli muost imomo lipi parapet i liti je uvik pun. Sest na parapet na Veli muost je lipo jer i kad je nojvručnija večer, na Veli muost lipo hlodi. Tamo se redovito znalo zasvirat i zakantat.

Imomo i dugaški parapet od pumpje po do šetnice.

Ali, parapet koji je uvik bi nojpopularniji i nojvažniji je oni pod Niđota taviernu. Vuon je bi i uvik je osto – parapet. Uvik se tako zvo i nikad ni imo drugačije ime. Bi je nojvažniji. Ako si želi vidit i bit viđen, ako si želi čut i da te se čuje, onda ti je misto bilo baž na ti parapet.

Vidičete sve, čučete sve.

Budte s nami i vidit čete sve ča se dogojo u naše misto, u naš Buol.

Jer, kad sedite na parapet, ne morate iskat informacije, ne morate pitat nikoga ništa. Tili ne tili, informacije von some dohodidu i lipidu se za vos.

Eto, zato se ovi portal zove – „bolski parapet“.

Posljednje vijesti
Povezane vijesti

Komentiraj

Unesite svoj komentar!
Ovdje unesite svoje ime